Hvað er í boði?

Af hverju ekki að kjósa fyrst um aðild að ESB og svo aftur þegar þegar aðildarviðræðum er lokið?

Aðild að ESB snýst ekki um hvað hægt er að fá mikið fyrir lítið. Aðildin er varanleg. Hún er sameining.

Það er miklu eðlilegra að samþykkja fyrst aðild með fyrirvara um að samningurinn verði ásættanlegur. Það er lítið mál að fá fólk til að samþykkja aðildarviðræður um hvað sem er með þeim "rökum" að við getum ekki neitað fyrr en við sjáum hvað er í boði!

Ef almenningur væri spurður um hvort við ættum að sækja um að verða 53 ríki Bandaríkjanna er ekki víst að svarið yrði fyrirsjáanlegt. Ekki ef linnulaus áróður allra fjölmiðla snerist um að við ættum fyrst að fara í aðildarviðræður og sjá hvað hægt væri að fá mikið fyrir lítið!

Hvað er í boði með aðildarviðræðum við ESB? Svar: Aðild að ESB. Um það á að kjósa.

Flestir vilja aðildarviðræður

Athugasemdir

[Haraldur Hansson, 8.3.2009 kl. 18:25]

Það skiptir ekki máli "hvað er í boði", við eigum að segja nei. Framsal á fullveldi mun alltaf leiða til tjóns í fyllingu tímans. Grátlegt hvernig menn vilja misnota kreppuna til að koma okkur inn í þetta bandalag sem hentar okkur engan veginn.

Með því á ég ekki við að í Evrópu sé slæmt fólk og enn síður að við séum eitthvað merkilegri en hinir. Aðeins að fámenn þjóð sem á sitt undir fiskveiðum (og enn meira nú eftir bankahrun) hefur engan hag af því að ganga þarna inn, en myndi skaðast af því þegar fram líða stundir. Menn virðast einblína á efnahag og kreppu en reyna ekki að horfa á þjóðfélagið allt og rýna 30 ár fram í tímann.

[Benedikt Halldórsson, 8.3.2009 kl. 18:40]

Haraldur: Ég tek undir hvert orð. En það er sjálfssagt að kjósa tvisvar um aðild. Fyrir og eftir viðræður.

[Loftur Altice Þorsteinsson, 9.3.2009 kl. 14:43]

Athyglisverður punktur hjá þér Benedikt. Um Evrópusambandið er búið að tala í 20 ár og flestir ættu að vita hvort þeir vilja aðild eða ekki. Hins vegar hefur Samfylkingin ruglað svo umræðuna að margir skilja hvorki upp né niður. Ég tel því að við eigum að hvíla algjörlega ESB umræðuna og glíma við miklilvægari viðfangsefni.

Við eigum hvorki að greiða atkvæði um viðræður né inngöngu í ESB. Evrópusambandið er á engan hátt lausn á okkar vandamálum. Þvert á móti er ESB okkar stóra vandamál. Þar er að finna okkar einu hatursmenn í heiminum. ESB hefur valdið okkur meira tjóni en allir aðrir samanlagt.

[Benedikt Halldórsson, 9.3.2009 kl. 19:17]

Já, ég tek undir orð þín Loftur en EF kjósa á um málið á alls ekki að kjósa um aðildarviðræður. Það ætti að spyrja fólk hvort það sé hlynnt aðild eða ekki, punktur. Þegar samningur liggur fyrir á að kjósa um hann.